நீயும் நானும்
**********
கையகல இடத்தில் கூடுதலாக
மண்குவிந்த வரப்பிற்காக
ஓயாமல் மல்லுகட்டினோம்
யாரோ ஒருவனால் நிலமே அபகரிப்பட்டதறியாமல்

சற்றே பொறுமையாக இருந்திருக்கலாம்
கூடுதலாக அரைமணி நேர
கெடுவு தண்ணீருக்கென
குடுமி பிடித்துக்கொண்டோம்
நம் ஆறும் குளமும்
கொஞ்சம் கொஞ்சமாக பறிபோவதறியாமல்

உன் மாடும்  எருமையும்
என் வயலுக்குள் வந்ததற்காக நானும்
ஆடுகள் சில உன் விதை வயலுக்குள்
வந்துவிட்டதற்காக நீயும்
உள்ளூர் பஞ்சாயத்தில் நின்றிருந்தோம்
டிராக்டர்களுக்குள் இவைகள்
மிதிபடப்போகும் அவலத்தை உணராதவர்களாக

ஒரு நாள் நின்றிருந்தோம்
முப்போக விளைச்சல்காரர்களாகிய நாம்
ரேசன் கடை வரிசையொன்றில்

27-01-2017