கவிதை

அகாலத்தில் இறந்தவன்
***************************
பள்ளியிலிருந்து திரும்பும்
தன் குழந்தைகளுக்கென
முத்தங்களை வைத்திருந்தான்

ஊடலின் இறுதியென
ஒரு அணைத்தலை
எதிர்பார்த்தபடியிருந்தான்

வாங்கிய கடனில்
வட்டியாவது செலுத்தி
மானம் காத்திடவென
சில நூறு ரூபாய்களோடு
சமாதானச் சொற்களையும்
சுமந்தபடியிருந்தான்

நண்பனின் இல்ல திருநாளுக்கென
மனதிற்குள் ஒரு
பயண ஒத்திகையில் இருந்தான்

யாரோ ஒருவரின்
ஆறுதலுக்கென
சில பகிர்தல்களையும்
தன் சட்டைப் பையில் வைத்திருந்தான்

அவனின் விருப்பங்களுக்கு
இடமளிக்காத ஒன்று
தனக்கான விருப்பத்தை நிறைவேற்றிப் போகிறது