உங்கள் பெயர்

பேரன்பின் மிகுதி கொண்டு
ஓடி வந்து அணைத்துக் கொள்கிறீர்கள்

பேசத் தவித்த பிரியம் நா தடுமாறி நின்றிருக்க
பற்றிக் கொள்கிறீர்கள் இருகரங்களையும்

கையில் வைத்திருந்த
ஒரு ஆரஞ்சுப் பழத்தின் பாதியை
என் வசமாக்குகிறீர்கள்

இறுதி முயற்சியாய்
தெருவோரக்கடையில்
தேநீர்க்கு சொல்கிறீர்கள்

என்ன செய்தும் திருப்தியுறாத
என் மேலான உங்கள் பிரியம்
விடைபெறுகிறது ஒரு கையசைப்பில்

என் மேலமர்ந்த வண்ணத்துப்பூச்சிக்கு
உங்கள் பெயர்சூட்ட நினைக்கையில்தான் உறுத்தியது
உங்கள் பெயரை நான் கேட்கவே இல்லை